Хеликоптерот Ingenuity, кој влезе во историјата со првиот лет на Марс, претрпе штета што ја заврши неговата мисија на Црвената планета, јавува BBC.
Американската вселенска агенција НАСА објави дека хеликоптерот морал да изврши „итно слетување“ при што му биле оштетени пропелерите. Првото вештачко летало кое летало на друга планета покрај Земјата го дочека својот крај. Сепак, Бил Нелсон од НАСА рече дека Ingenuity има завршено многу повеќе мисии од првично планираните и дека го отворил патот за идните летови во нашиот Сончев Систем.
Ingenuity останал во исправена положба, но фотографиите направени од роверот Perseverance покажуваат дека барем еден од неговите пропелери е оштетен и повеќе не може да лета. Се истражуваат околностите под кои настанала штетата.
Хеликоптерот пристигна на Марс во февруари 2021 година во внатрешноста на роверот Perseverance. Беше наменет да послужи како краткорочна демонстрација на технологија која овозможува лет во ултра тенката атмосфера на Марс. Откако успеа во тоа, станал поддршка на роверот Perseverance во истражувањето на областите од интерес на Марс, а истовремено му помагаше на роверот и неговите оператори на Земјата да ја изберат најдобрата траекторија.
Пред да ја заврши мисијата во четвртокот, Ingenuity изврши 72 лета и леташе 14 пати подалеку од првично планираното.
Многумина ќе жалат за симпатичниот хеликоптер, но крајот дојде во вистинско време. Роверот Perseverance ќе оди на долги и брзи возења додека бара пат до работ на кратерот Језеро. Да останеше функционален, хеликоптерот веројатно ќе се бореше да остане во чекор со Perseverance.