Поранешниот централен бек на Реал Мадрид и Пари Сен-Жермен, Серхио Рамос, се врати во својот клуб од детството, Севиља, како слободен играч, потврди шпанскиот клуб во понеделникот.
37-годишниот Рамос остана без клуб по крајот на договорот со ПСЖ, по што доби богата понуда од саудискиот Ал Итихад, но тој цело време инсистираше на враќање во Шпанија, потпишувајќи едногодишен договор со андалузискиот клуб.
„Серхио дојде во нашата младинска академија кога имаше 7 години пред да дебитира во првиот тим на 16 години во сезоната 2002/2003. Нашиот бек се враќа по речиси две децении откако замина на 19 години во Реал Мадрид“, велат од Севиља.
Рамос остана 16 години на „Сантјаго Бернабеу“, освојувајќи 4 титули од Лигата на шампионите, 5 од Ла Лига и одигрувајќи фантастични 671 натпревар, во кои како дефанзивец постигна зачудувачки 101 гол. Во Франција, тој помина две сезони и освои 2 титули од Лиг 1 со ПСЖ. Рамос во кариерата исто така го има и Мундијалот во 2010 со Шпанија, како и 2 титули од ЕУРО, пред да се повлече од репрезентацијата во февруари годинава откако беше изоставен од тимот што замина на Мундијалот во Катар.
