Најдобриот украински фудбалер на сите времиња, Андриј Шевченко, протестираше на улиците на Лондон против војната во Украина и уште еднаш повика на мировен договор.
Од Берлин до Њујорк, преку Лондон, Рим и Истанбул, стотици илјади демонстранти ја поддржаа Украина, а во главниот град на Англија легендарниот Шевченко излезе на улица со своите деца.
Потоа на социјалните мрежи објави слики од него на плоштадот Трафалгар, во срцето на британската престолнина. На неговите рамена, цврсто врзано, беше жолто-синото знаме на неговата земја, а во раката имаше симболи кои повикуваат на мир и крај на непријателствата.
„Не на војната“, „Стоп за војната“ и „Нема да простиме, нема да заборавиме“, пишува на паролите што ги држеа неговите деца.
„Стоп за војната во Украина. Слава на Украина“, напиша поранешниот селектор на украинската репрезентација во описот на објавата споделена на социјалните мрежи.
Веднаш откако се пензионира од играчката кариера Шевченко ѝ се придружи на партијата Украина - Напред!, наследник на Солијалдемократската партија на Украина која Андриј јавно ја поддржуваше уште во 90-тите. Шевченко учествуваше на парламентарните избори во Украина во октомври 2012 година, но неговата партија не успеа да освои пратенички места.
Неуспешната авантура во политиката го натера сепак да си остане на зборот, дека по пензионирањето ќе стане тренер, иако поминаа 4 години за тоа да се оствари. Летото 2016 седна на селекторското столче на Украина, а од ноември минатата година кратко ја водеше и Џеноа, соработувајќи со нашиот Горан Пандев. Моментално е без ангажман.
Со својата американска сопруга Кристен Пазик, која работи како модел, има 4 деца (Џордан, Кристиан, Олександр и Рајдер). Кристен е ќерка на поранешниот МЛБ фрлач Мајк Пазик.
