Дефанзивецот на „Нераѕурите“ смета дека од нерешениот резултат најмногу загубил Интер кој, со оглед на шансите, требало да победи.
Словакот Милан Шкринијар е разочаран што Дербито дела Мадонина синоќа заврши со нерешен резултат бидејќи неговиот Интер имаше неколку одлични прлики за гол. Лаутаро Мартинес промаши пенал, а чисти зицери промашија Николо Барела и Артуро Видал.
„Беше тешок натпревар каков и што очекувавме, но со оглед на шансите кои ги имавме фер е да се каже дека крајниот исход се загубени 2 бода. Создадовме многу шанси за гол и според мене требаше да победиме“, рече Шкринијар во изјава дадена за DAZN.
Резултатот од 1:1 го отвори Хакан Чалханолу во 11. минута од пенал, а Стефан де Врај шест минути подоцна си постигна ефектен автогол со глава за израмнување.
Сезонава Интер не успеа да победи на ниту еден дерби дуел. Со Аталанта (2:2), Јувентус (1:1) и Милан (1:1) одигра нерешено, а загуби од Лацио (1:3).
„Треба многи повеќе да вадиме од овие меѓусебни дуели бидејќи уште еднаш го доминиравме Милан, а извадивме само бод. Играме добро, подобро сме организирани и балансирани, но треба да бидеме порешителни при шансите за гол“
Интер е трет на табелата со 25 бодови, 7 зад водечките Наполи и Милан кои имаат по 32.
Следува репрезентативна пауза, а потоа Интер го чека ново дерби и тоа со лидерот Наполи кој сезонава се наметна како главен конкурент за Скудетото.
