Шпанската влада нема да им нареди на потрошувачите да ја ограничат потрошувачката на гас, рече министерката за енергетика Тереза Рибера откако Шпанија рече дека ќе се спротивстави на предлогот на Европската Унија за намалување на потрошувачката на гас.
„Нема да воведеме во закон обврска за поставување на температурата на домашните термостати“, рече таа во интервју за локалната радиостаница Cadena SER. Владата сепак би препорачала луѓето да штедат енергија, рече таа. Таа додаде дека Владата ќе ја заштити и потрошувачката на гас во индустријата.
Министерката во средата рече дека нејзината влада ќе се спротивстави на предлогот на Европската Унија за намалување на потрошувачката на гас, бидејќи земјата не е зависна од рускиот гас откако во минатото инвестираше во инфраструктура за складирање и втечнување гас.
Планот на ЕУ
Европската комисија предложи доброволна цел за сите земји на ЕУ да ја намалат потрошувачката на гас за 15 отсто од август до март, во споредба со нивната просечна потрошувачка во истиот период во периодот 2016-2021 година.
Предлогот ќе му овозможи на Брисел да ја направи целта задолжителна во случај на проблеми со снабдувањето. Неколку земји како Австрија, Германија и Данска рекоа дека размислуваат за вонредни планови кои на крајот би вклучиле рационализирање на гасот. Планот на ЕУ наиде на отпор од другите земји-членки, вклучувајќи ги Полска и Унгарија.
Се побуни и Португалија
Португалската влада нема да го поддржи планот предложен од Брисел во средата за намалување на европската потрошувачка на гас за 15 отсто за да се надмине можното намалување на руските испораки, изјави Жоао Галамба, државен секретар за животна средина и енергија.
„Португалија ќе се спротивстави на несразмерната мерка“, рече тој во интервјуто за денешното издание на дневниот весник Publico.
Предлогот на Комисијата „не е прилагоден на земјите кои не се меѓусебно поврзани“ со гасна мрежа како Португалија, објасни тој.
На тој начин Португалија се приклучи на позицијата на Шпанија, чија министерка за еколошка транзиција, Тереза Рибера, се спротивстави на овој предлог, сметајќи го ниту „фер“ ниту „ефективен“.
И Грција е против
Грција начелно не се согласува со предлогот на Европската комисија за намалување на потрошувачката на гас за 15 отсто, рече портпаролот на грчката Влада Јанис Иконому на денешниот редовен брифинг со новинарите, објаснувајќи дека тие ќе продолжат да ги поддржуваат нивните веќе доставени предлози.
„Грчката Влада начелно не се согласува со предлогот на Комисијата за намалување за 15 отсто на употребата на природниот гас. Поднесовме низа предлози и во однос на цените, односно економската димензија на природниот гас и во однос на снабдувањето. И ќе инсистираме на овие предлози“, рече Иконому.
Додаде дека ќе останат на нивниот став дека „насоката на овие предлози може да донесе многу суштински и клучни решенија„ за справување со енергетската криза во Европа.
