За некои луѓе правењето склекови може да биде многу напорно од неколку различни причини. Доколку не можете да правите склекови, постојат алтернативни начини како да го вежбате горниот дел од телото.
Без разлика од кои луѓе сте, дали од оние кои не можат да прават склекови или од оние кои сметаат дека тие се премногу досадни и статични, постојат решенија за вежбање на истите мускули кои нема да ви претставуваат проблем да ги пробате, па дури можете и да ги ротирате за вежбањето да не ви биде монотоно.
Летање
За вежбање на градните мускули, една од најдобрите вежби е летањето со тегови. Можете да легнете на под, или пак на правата клупа во теретана и земете по еден тег со идентична тежина во двете раце. Испружете ги рацете така што тие ќе направат форма „Т“, малку подвиткајте ги лактите за да не ризикувате истегнување на мускулите и потоа почнете да ги подигате теговите над градите додека не ги допрете еден со друг. Направете три или четири серии по 10 повторувања.
Подигања за трицепс
За вежбање на трицепсите, можете да пробате подигања на паралелни шипки. Ставете ги рацете на две паралелни шипки, спојте ги нозете со малку подвиткани колена и почнете да се кревате. Доколку немате услови за одење во теретана, можете слична вежба да направите дома, со тоа што ќе ги ставите рацете зад вас на столче или кревет и ќе се спуштате до земја и подигате нагоре.
Подигања на шипка
За крај, доколку сте самоуверени и доколку сметате дека имате доволно сила, можете да пробате да се подигате на шипка. Ова е наједноставната вежба од трите, но треба многу напор за да се направи. Едноставно е, само фатете се со рацете за хоризонтална шипка, вкрстете ги нозете кај глуждовите, малку подвиткајте ги колената и почнете да се подигате.