Италијанскиот дефанзивец вели дека Бразилецот погрешно го разбрал италијанскиот израз за „ќе те истепам“. Тој беше обвинет дека на дуелот Интер - Наполи во неделата расно го навредил гостинскиот играч.
Франческо Ачерби синоќа се сретна со раководството на Интер, повторувајќи уште еднаш дека не рекол ништо расистичко. Се чини дека во реконструкцијата на дефанзивецот изречената фраза била „ќе те помодрам“. Тоа на италијански е „ti faccio nero“ (ти фачо неро), што во буквален превод значи „ќе те направам црн“, алудирајќи на тоа дека ќе го истепа.
Оттука и изјавата на Ачерби по враќањето од репрезентацијата: „Жуан Жезус погрешно ме разбра“. Тоа навистина нема никаква врска со бојата на кожата на Бразилецот, оти тој израз во Италија се користи за сите. Зборот „неро“ (црн) тука е само коинциденција.
Интер сега чека да ја дознае можната санкција која според собраното од Обвинителството, спортскиот судија ќе ја донесе за играчот. Сигурно клубот никако не сака неговото име да се поврзува со зборот расизам и врз основа на тоа каков ќе биде конечниот исход од оваа приказна, ќе одлучи дали ќе преземе дополнителни мерки кон Ачерби.
На крајот, одличниот дефанзивец ни крив ни должен може да добие казна. Во договор со селекторот Лучано Спалети, тој ќе го пропушти репрезентативниот собир и пријателските натпревари во САД против Венецуела и Еквадор.
