Кромидот е нискокалорична билка препознатлива по мирисот, а потекнува од Азија и од Блиски Исток. Илјадници години се употребува за јадење, но и во лековити цели.
Без кромид не се подготвува ниту едно јадење, без разлика дали го преферирате свеж во салата и сендвичи или варен во чорби, манџи или печено месо.
Заедно со морковот и магдоносот се смета за основна намирница во кујната. Ако го јадете свеж ќе забележите дека има малку лут вкус, а доколку го изложите на долготрајна термичка преработка на ниска температура, ќе стане сладок и карамелизиран.
Содржи бројни хранливи материи, од витамини А, Ц и Е до калциум, калиум и магнезиум. Исто така, содржи кверцетин кој го намалува високиот крвен притисок, спречува создавање наслаги на ѕидовите на артериите, но и формирање на крвни згрутчвуања така што ја намалува можноста од срцеви заболувања.
Богат е со антиоксиданси кои го подобруваат имунитетот. Делува антивоспалително. Добар извор е на калциум, минерал неопходен за здрави коски.
Студија објавена во списанието Biomolecules откри дека со консумација на свеж кромид се зголемува нивото на тестостерон кај мажите и помага кај проблеми со еректилната дисфункција.
Иако многумина го избегнуваат поради непријатниот здив, истражувањата покажаа дека придонесува за здравјето на забите.
Кромидот исто така важи за диуретик и ја поттикнува работата на бубрезите.
Може да предизвика дигестивни проблеми како надуеност, мачнина и повраќање. Ако имате проблеми со синдром на нервозно црево подобро е да избегнувате јадење кромид.
Медицински својства и здравствени придобивки
Се смета дека кромидот помага при широк спектар на заболувања - од обична настинка, па сѐ до срцеви заболувања, дијабетес, остеопороза и други болести. Има истражувања кои покажале дека зголемената исхрана со кромид доведува до намалување од ризикот за добивање рак на главата и на вратот.
Во Индија, некои луѓе не јадат кромид, бидејќи веруваат дека делува како афродизијак.
