Шведска не успеа да го интегрира големиот број имигранти што ги прими во последните две децении, што резултираше со создавање на паралелни општества и насилство од банди, рече премиерката Магдалена Андерсон, која покрена низа иницијативи за борба против организираниот криминал.
Бројни Швеѓани беа изненадени и шокирани од немирите на почетокот на овој месец, во кои беа повредени повеќе од 100 полицајци.
Насилството избувна по палењето на Куранот на митинг организиран од шведско-дански политичар и најавата дека ќе одржува митинзи во имигрантските населби.
Во Малме, во средината на април, избувнаа протести против екстремно десничарските движења предводени од Расмус Палудан, беа запалени канти за ѓубре, автомобили и продавници, а полицијата беше гаѓана со камења и пиротехнички средства.
Андерсон го вперува прстот на вина за нередите и нападите на полицијата врз криминалците, оценувајќи дека и на исламистите, и на екстремната десница им е дозволено да дејствуваат во Шведска.
„Дозволено е сегрегацијата да оди толку далеку што сега имаме паралелни општества во Шведска. Живееме во иста земја, но во сосема поинаква реалност“, рече Андерсон.
Бројот на луѓе родени во странство во Шведска се удвоил на два милиони во последните две децении, што сочинува една петтина од населението.
Социјалдемократите на премиерката беа на власт 28 од последните 40 години, вклучувајќи ги и последните осум.
Андерсон воведува низа мерки за да ги обесхрабри младите имигранти да се приклучат на банди и се обидува да ги оттргне од улиците и да ги задржи на училиште што е можно подолго.
Таа истакна дека Шведска има огромен прилив на имигранти, но дека мерките за интегрирање на странците се недоволни.
„Општеството беше многу слабо, како и ресурсите за полицијата и социјалните служби“, рече премиерот.
По големиот прилив на имигранти од Блискиот Исток во 2015 година, Шведска значително ја заостри својата имиграциска политика.