Претседателката Гордана Силјановска-Давкова денеска му го додели мандатот за состав на нова влада на лидерот на ВМРО-ДПМНЕ, Христијан Мицкоски.
„Според Уставот, односно според членот 84, став 1, алинеја 1, една од надлежностите на претседателот е доделување на мандат за состав на влада.
Согласно членот 90, став 1, алинеја 1, мандатот задолжително се доделува во период по истекот на 10 дена од конституирањето на Собранието и тоа на лидерот на партиите што имаат мнозинство во Собранието. Сведоци сме дека денеска истекува десетиот ден“, нагласи претседателката на чинот на доделување на мандатот.
„При конституирањето на Собранието, претседателот на Собранието беше избран со 76 гласа 'ЗА'. Овој резултат и преговорите што се во тек, ми даваат за право основано да сметам дека лидерот на ВМРО-ДПМНЕ, Христијан Мицкоски, има сериозна можност да формира влада, односно да освои 61 глас зад својата програма и зад составот на владата, што се разбира ќе го предложи во следните 20 дена“, нагласи Силјановска-Давкова.
Задоволство ми е, со сигурност да верувам, рече претседателката, дека чекорот што го преземам на Христијан Мицкоски е вистински правен и политички чекор.
