Младиот талент, чиј татко е славниот Дејвид Бекам, влезе во водите на професионалниот фудбал откако го направи своето сениорско деби откако потпиша и професонален договор.
Синоќа рано утрото со бројот 11 на грбот во стартниот состав на Форт Лодердејл се најде играч со име Ромео Бекам, син на големиот Дејвид Бекам.
Младиот Бекам летово го потпиша својот прв професионален договот откако беше пратен на позајмица во Форт Лодердејл, клуб кој е всушност резервен состав на Интер Мајами, чиј косопственик е токму неговиот прославен татко.
Форт Лодердејл е клуб кој се натпреварува во УСЛ Лиг 1, односно третото по ранг натпреварување во САД и лига која по квалитет не може да се пофали дека добро стои. Но, првиот чекор за Ромео е направен, одигра 79 минути против тимот на Тормента напуштајќи го теренот додека неговиот тим имаше водство од 2:1 (потоа натпреварот заврши 2:2).
Ромео играше на позицијата десно крило, истата онаа на која неговиот татко жареше и палеше во Манчестер Јунајтед, Реал Мадрид, Лос Анџелес Галакси, Милан и ПСЖ. Извештаите од САД велат дека младиот Бекам не се снашол најдобро на неговото деби и само 19 пати ја допрел топката пред да биде заменет.
Единствено го издвојуваат потегот од 57. минута кога одлично проиграл со Харви Невил, инаку син на тренерот на Интер Мајами и поранешен соиграч на Дејвид Бекам - Фил Невил, но создадената шанса нивен соиграч не ја претворил во гол.
За 19-годишниот Ромео сезонава е времето кога ќе покаже дали поседува нешто од талентот на неговиот татко, а слабата лига во која се натпреварува неговиот тим е одлично место за први почетоци на млад фудбалер во професионалниот фудбал.
