Македонскиот олимписки комитет денеска потврди дека Дардан Дехари ќе биде единствен носител на македонското знаме за време на церемонијата на отворањето на Зимските олимписки игри во Пекинг.
Натпреварувачот во алпско скијање, тетовецот Дардар Дехари, требаше да го носи знамето заедно со нордијката Ана Цветановска, но таа отпадна од комбинација поради близок контакт со тренерот Борче Јованоски кои има два позитивни теста на COVID-19. Ана досега на сите тестови е негативно, но правилата сепак велат дека не може да го носи знамето.
„Доколку има два последователни негативни тестови, со посебно одобрение, Борче Јованоски ќе може веднаш од специјализираниот ковид-хотел да се врати во Олимпиското село во Пекинг“, објави МОК.
Свеченото отворање на зимската Олимпијада е в петок со почеток во 13 часот по македонско време и директен пренос на МРТ1.
Македонија на Игрите ќе биде претставувана од тројца олимпијци и тоа:
– Ана Цветановска - крос кантри - тренер Борче Јованоски - дисциплини 7,5 km слободно плус 7,5 km скијатлон и 10 km класично (настап на 5 и 10 февруари).
– Дардан Дехари - слалом и велеслалом - тренер Антонио Ристевски (настап на 13 и 16 февруари).
– Ставре Јада - крос кантри - тренер Борче Јованоски - дисциплини спринт слободно 1,5 km и 50 km слободно (8 и 19 февруари).