Македонската фудбалска репрезентација ќе има двонеделен собир во Скопје пред ЕУРО во чии рамки ќе одигра и еден пријателски натпревар.
Откако синоќа селекторот Игор Ангеловски го заврши тридневниот мини-тренинг камп за играчи кои конкурираат за во репрезентацијата, го откри и планот за подготовките во пресрет на историскиот настап на ЕУРО 2020.
Македонија ќе се собира на 25 мај и ќе тренира во Скопје до 8 јуни кога со чартет лет ќе се летне за Букурешт каде ги играме првите два натпревара од Европското првенство, против Австрија и Украина. Интересно, ова ќе биде прв пријателски натпревар по тригодишна пауза.
Ова ќе биде седма пресметка со Словенија со чија репрезентација Македонија го одигра и првиот историски натпревар по осамостојувањето. Меѓусебниот скор е 4 наши победи и по 1 нерешена и 1 пораз со гол-разлика од 12:6 во наша корист.
Во однос на тренинг-кампот, кој заврши вчера со тест натпревар на кој репрезентацијата со 2:0 славеше над Работнички, селекторот ја даде следнава изјава:
„Сакам да им се заблагодарам на фудбалерите што ги одработија овие три тренинзи, како и на клубовите што ги ослободија од обврските, бидејќи ова не беше ФИФА термин. Благодарност и на Работнички што ни излезе во пресрет да одиграме тренинг натпревар. Резултатот беше во втор план, целта беше фудбалерите да имаат можност да се запознаат со методите и принципите на работа во репрезентацијата. Некои од нив веќе имаа такво искуство, но другите што немаа, имаа можност за тоа, а ние имавме можност уште подобро да се запознаеме со нивните квалитети и можности. Задоволен сум од тоа што го одработија овие три дена, нормално дека ќе ги следиме во иднина, и во зависност од нивната форма и потребите на репрезентацијата ќе ги носиме следните одлуки“.
Македонија во март игра три натпревари во рамки на квалификациите за пласман на Мундијалот во Катар во 2022 година, во Романија (гости), Лихтенштајн (дома) и Германија (гости).
