Едвард Сноуден, поранешен вработен во американската ЦИА, соработник на НСА и „свиркач“ кој во 2013 година доби азил во Русија бидејќи разоткри тајна американска програма за масовно прислушување, гостуваше во емисијата на еден од најпознатите автори на подкасти во светот – Џо Роген.
Во неговото гостување во подкастот Joe Rogan Experience, кој како и другите епизоди траеше речиси три часа, Сноуден опиша точно како смартфоните кои ги користиме нѐ шпионираат и што можеме да направиме за да го одбегнеме тоа.
„Голема работа што се смени од 2013 година е што сега мобилното е на прво место“, вели Сноуден во интервјуто и објаснува како прислушувањето денес главно се случува преку мобилни телефони бидејќи луѓето ги користат повеќе од компјутерите.
„Имате мобилен некаде во просторијата. Исклучен е, односно барем екранот му е исклучен. Ако некој ви прати порака, екранот ‘оживува’. Како се случува тоа?“, реторички прашува Сноуден.
„Кога вашиот мобилен е вклучен, постои запис за вашето присуство на тоа место. Секој смартфон, секој мобилен телефон воопшто, е поврзан со најблискиот предавател. Дури и кога е исклучен и мислите дека не прави ништо, тој невидливо кажува: тука сум, тука сум“, му рече тој на Роген.
Деталното објаснување на Сноуден погледнете го во видеото подолу:
