Научниците од Универзитетот ЕТХ во Цирих, кои работат со Tethys Robotics, развија подводен робот што може да се користи во ситуации премногу опасни за нуркачите.
Новата машина е всушност автономно подводно возило специјално дизајнирано за употреба во предизвикувачки и опасни средини како што се матни канали и реки. Кога конвенционалните техники за пребарување и спасување не успеваат, тука е роботот Tethys да ја преземе операцијата.
Роботот е опремен со заменлива литиум-јонска батерија која му овозможува да работи 4 часа со едно полнење. Тежи 30 килограми и има максимална брзина од 2 метра во секунда. Опремен е и со оптички кабел со опсег до 10 километри, како и со акустични сензори, камери и алгоритми базирани на вештачка интелигенција, кои му овозможуваат автономно да пребарува големи површини под вода и ефикасно и брзо да забележува предмети или луѓе. Тоа значи дека може да ја извршува работата на нуркачите и спасувачките тимови во најопасните ситуации.
Кога ќе забележи некој предмет, роботот може да го фати и да носи до 40 килограми товар. По детектирање на целта, човечкиот оператор може да ја преземе контролата над роботот и на тој начин да ја елиминира секоја опасност или можна грешка.
Роботот веќе е користен од локалните власти за подводни операции за пребарување и спасување.
Сепак, ова не е првиот робот од овој тип, бидејќи во февруари годинава беше претставен роботот RoboSalps дизајниран да работи во непознати и екстремни средини како вонземни океани.
