Општо земено, сите чаеви се здрави, а зелениот чај се смета за еден од најздравите бидејќи има добар ефект врз општото здравје. Велат дека овој чај промовира и слабеење, но една нутриционистка тврди дека доколку во него додадете само една состојка, овој чај ќе стане најздравиот пијалак во светот.
„Најздравиот билен чај што можете да го пиете е зелениот чај направен од листовите на прекрасното кинеско растение Camellia sinensis бидејќи содржи многу полифеноли и антиоксиданси“, вели нутриционистката Дијана Миниќ.
Сепак, таа истакнува дека повеќето луѓе не знаат дека додавањето сок од лимон во зелениот чај може да го зголеми ефектот на катехините.
„Неодамнешните истражувања покажаа дека зелениот чај со лимон има многу повеќе катехини и полифеноли од самиот зелен чај, кој веќе содржи импресивна листа на антиоксиданси“, рече таа.
Покрај тоа што лимонот додаден во зелениот чај го подобрува ефектот на катехините, нутриционистката истакнува дека лимонот поради киселината што ја содржи му помага на телото полесно да ги апсорбира сите корисни состојки.
Исто така, Миниќ вели дека е добро да се користи кора од лимон бидејќи ги содржи и фитонутриентите салвестрол и лимонен, кои имаат моќно антиоксидантно дејство.
„Редовното консумирање зелен чај може да ја подобри работата на организмот и да ублажи многу здравствени проблеми, а ако додадете малку сок од лимон или кора од лимон, ќе ги подобрите сите негови добри ефекти“, додава таа.
