Манчестер Јунајтед во понеделникот вечер играше дерби на гости кај Челси, а веќе денеска има ново гостување, кај Бриж во Лига Европа.
„Два дена опоравување не е многу, тоа за нас е голем удар. А моравме да се подготвиме за овој натпревар. Имаме 7 натпревари за 21 ден почнувајќи од понеделник и завршуваме против Сити. Имаме многу играчи, а тука сме 19. Неколкумина од младинците не допатуваа“, се жали тренерот Оле Гунар Солскјер на згуснатиот распоред.
„Со сите овие натпревари што ни следуваат, ќе мора да ги ротирам играчите. Игало е еден од оние кои би можеле да стартуваат денеска“.
Нигерискиот репрезентативец Одион Игало дојде во Јунајтед како последно засилување зимава. Против Челси го запиша своето деби, но ги одигра само последните моменти.
„Игало е поинаков тип на напаѓач. Веќе на тренинг видовме дека си ја знае работата, знае како да игра како центарфор и е неверојатно професионален“.
Солскјер вечерва не може да смета на повредените Маркус Рашфорд, Пол Погба и Скот МекТоминај.
„Ќе биде тешко за Рашфорд да игра на ЕУРО. Му треба време. Се надевав дека ќе се опорави побрзо отколку што изгледаше дека ќе треба. Ќе биде во аут уште неколку месеци, дефинитивно“.
„Пол сѐ уште не бил дел од тренинг сесија со тимот. Зависи од тоа како се чувствува, или пак од тоа кога ќе се чувствува подготвен да тренира. Но, сега не е ни блиску до тој потег“.
Натпреварот на „Јан Брејдел“ стадионот во Бриж почнува во 18.55 часот, а ќе го суди Белорусинот Алјаксеј Кулбакоу.
