Денеска во натпреварот за третото место на Мундијалот во Русија силите ќе ги одмерат репрезентациите на Белгија и Англија. Двете репрезентации добро се познаваат бидејќи играа во групната фаза од овој турнир а и голем дел од белгиските репрезентативци настапуваат во англиската Премиер лига.
За Англија, ова е шанса да се најде на подиумот за првпат по 1966 година, кога беше шампион, додека за Белгија овој натпревар е можност за првпат да дојдат до медал од Светските првенства.
И двете репрезентации направија измени во пресрет на натпреварот, но за разлика од нивниот претходен дуел во групната фаза, тие нема да настапат со комплетен „Б“ тим. За Белгија во првиот состав се најдоа Нацер Чадли и Јури Тилеманс, кои оставија одличен впечаток во ограничената минутажа досега. Англичаните пак, со Фил Џонс и Рубен Лофтус-Чик во составот се надеваат дека ќе успеат да ги „скратат“ нападите на Белгија кои најчесто одат преку Кевин де Бруин и Еден Хазард.
Во двете репрезентации најопасните играчи се наоѓаат во нападот. Белгија го има Лукаку, додека Англија го има Кејн, двајца играчи кои настапуваат во Премиер лигата и во изминатата сезона беа први стрелци во нивните клубови, Манчестер Јунајтед и Тотехем, последователно.
Денешниот натпревар е само загревање за она што ќе се случува утре – големото финале помеѓу Франција и Хрватска, во кое двете најдобри репрезентации на ова првенство ќе се борат за титулата светски првак.