Ја знаете изреката „Формата е моментална, но класата е вечна“? Никој не ја потврдува оваа реченица повеќе од Вејн Руни, кој откако се пресели во САД постојано ја покажува неговата фудбалска вештина со неверојатни потези. Овојпат, англискиот мајстор погоди од својата половина за да му донесе победа на Ди Си Јунајтед.
Тимот на Вејн Руни беше домаќин на натпреварот против Орландо Сити, а некогашниот фудбалер на Манчестер Јунајтед и Евертон го постигна единствениот гол, и тоа на спектакуларен начин.
Во десеттата минута, при еден контра-напад кој го предводеше Руни, тој го забележа голманот на противничкиот тим кој беше истрчан надвор од шеснаесетникот и со топовски удар ја испрати топката кон голот. Како и многупати претходно, резултатот беше ист – погодок за Руни и срам за противничкиот голман.
За легендарниот Англичанец ова беше осми гол во 16-от натпревар сезонава, а тој притоа забележа и четири асистенции досега.
