По неколку месеци објавување тизери и фотографии од сетот, Netflix конечно го објави официјалниот трејлер за Avatar: The Last Airbender.
Оваа серија е адаптација на истоимената анимирана серија од крајот на 2000-тите, создадена од Мајкл Данте Димартино и Брајан Кониецко. Извршен продуцент на верзијата на серијата на Netflix е Алберт Ким, најпознат по сериите Sleepy Hollow и Nikita.
Дејствието е сместено во фантастичен свет, инспириран од митологиите на Азија и Инуитите, кој е поделен на четири нации: Вода, Земја, Оган и Воздух. Во секој народ има господари (бендери) кои имаат моќ да манипулираат со еден од овие четири елементи.
Но, само една личност, позната како Аватар, има способност да ги контролира сите елементи. Должноста на Аватарот е да го одржува мирот во светот. Во оваа приказна го следиме 12-годишниот Аватар Аанг, кој со своите пријатели од различни нации се обидува да го врати мирот во светот во кој владее стогодишна војна.
Откако трејлерот беше објавен на YouTube и официјалната Facebook страница на Netflix, обожавателите на серијата не штедеа на пофални зборови во коментарите.
„Ова е сè што сакав да видам! Се надевам дека нема да се разочарам“, „Сè изгледа одлично досега“, „Судејќи според трејлерот, ова ќе биде одлична серија“, „Ова изгледа како совршена адаптација досега“, „Многу сум возбудена што можам да се расплачам“, „Може ли февруари да дојде побрзо? Едвај чекам“, се дел од позитивните коментари под видеото.
Серијата ќе започне да се емитува на Netflix на 22 февруари.