Објавени се нови драматични фотографии од леталото Odysseus кое слета на Месечината минатата недела.
Фотографиите, заедно со огромен број податоци, се преземени само неколку часа пред да падне ноќта на јужниот пол на Месечината и да се изгасат батериите на лендерот.
Intuitive Machines, американската компанија која стои зад мисијата, рече дека сега ќе биде можно да се реконструира слетувањето за да се разбере како Odysseus завршил превртен на страна. Компанијата исто така откри дека лендерот би можело да „оживее“ за 2-3 недели кога Сонцето повторно ќе изгрее.
Сепак, големата непозната е дали батериите и електрониката ќе можат да ги преживеат температурите кои паѓаат под -200 степени Целзиусови.
„Нема пофалби. Само прослава“, рече ко-основачот на компанијата, Стив Алтемус, на прес-конференција во Хјустон.
Првата од фотографиите, направена кога лендерот го допре тлото, покажува дека барем едната нога му била скршена, а од моќта на ракетниот мотор се разлетуваат камења и прашина, пишува Sky News.
Друга фотографија го прикажува лендерот превртен на страна со темен елипсовиден кратер оддалечен околу 500 метри. Научниците веруваат дека кратерот би можело да е стар две милијарди години. Податоците од телеметријата покажуваат дека Odysseus првично слетал исправено, но потоа се превртел на блага падина.
Во услови на ниска лунарна гравитација, беа потребни околу две секунди да се запре. НАСА ѝ плати на Intuitive Machines 118 милиони долари за да однесе шест научни инструменти на Месечината. Сите испратија податоци, и покрај положбата на лендерот, а навигацискиот светилник сега е во функција, што ќе им помогне на идните слетувања.
Но, ласерскиот систем за навигација кој требаше да се користи за слетување не успеа да ја заврши задачата.
„Секако, тоа е нешто што можеме да го поправиме следниот пат“, рече Алтемус.
Компанијата беше под притисок да објасни зошто слетувањата биле помалку од совршени, кога со мисијата Apollo со далеку понесофистицрани летала Американците успешно слетаа шест пати во 60-тите и 70-тите.
„Имавме поинаков предизвик. Бевме ограничени на трошоците, со договор за фиксна цена од владата. Моравме да ја завршиме мисијата во точно одредено време. Оваа премногу ограничена средина принуди иновации, а ова беше првиот лет на нашето вселенско летало“, објасни Алтемус.
На заедничка прес-конференција, Intuitive Machines и НАСА дадоа оптимистичка оценка за досегашната мисија. Д-р. Џоел Керанс од НАСА рече дека мисијата е „првиот чекор кон враќање на Месечината“ и дека „од неа ќе произлезе многу знаење“.
Intuitive Machines планира втора мисија подоцна оваа година која ќе носи бушилица за пребарување на вода под површината на Месечината. Ќе има и „вселенска инка“ која ќе лета во длабоко засенчени кратери за кои научниците веруваат дека може да содржат големи количества мраз.
