Стив Банон, соборениот главен стратег на Белата куќа, наводно размислува за отворање телевизиска мрежа која ќе му овозможи да се одмазди на умерените советници во Белата куќа и да го притиска претседател Доналд Трамп да продолжи со популистичката агенда на економски национализам.
Сојузниците го споредија Банон со “тигар ослободен од кафез”, што укажува дека работите што ќе следат ќе бидат “грди”, со оглед на тоа што на мета му е републиканскиот естаблишмент и она што тој го нарекува “Демократи од западното крило“. Телевизијата на Банон, ако се формира, ќе биде ривал на телевизијата „Fox News“, сопственост на Руперт Мардок кој го поддржува Трамп, но кој за Банон е премногу умерен.
На мета на Банон ќе биде кругот на претседателски советници познати како “глобалисти”. Тоа ги вклучува Џеред Кушнер и Иванка Трамп, главниот економски советник Гери Кон, секретарот за финансии Стив Мнучин и советникот за национална безбедност Мекмастер, со кого Банон ја изгуби битката околу испраќањето повеќе војници во Авганистан.
Исто така, на линијата за „отстрел“ се републиканските лидери во Конгресот, како што се Пол Рајан, спикерот на Долниот дом и лидерот на мнозинството во Сенатот, Мич Меконел, кои Банон ги обвинува за одолговлекување на агендата на Трамп, вклучувајќи го и градењето на граничниот ѕид и уривањето на здравствената политика „Obamacare“.
Банон има неколку сојузници во рамките на Белата куќа кои ја промовираат неговата агенда на економски национализам. Имаше шпекулации дека неколкумината кои останаа, вклучувајќи ги високиот политички советник Стивен Милер и заменик-помошникот Себастијан Горка, може да бидат „исчистени“ од страна на Џон Кели, новиот шеф на кабинет кој се обидува да воведе ред во хаотичната администрација.
