Иако мерките за заштита од коронавирус налагаат да носиме маски и на отворено и да го ограничиме бројот на луѓе со кои сме во контакт, пасивното седење дома по цел ден, особено ако домот е и ваша канцеларија во моментов, може да биде лошо за вашето ментално здравје.
Д-р Џо Даниелс, клинички психолог специјализиран за анксиозност и замор, објасни што може да се случи ако ги поминете деновите заклучени во вашите четири ѕида - во страв да не се заразите и во општа вознемиреност од целата ситуација.
„Нормално е дека не сакате да излегувате, не грижете се. Во овој период од годината и онака обично одиме во хибернација. Затоа, разумно е да се повлечеме во затворени простори“, вели таа.
Сепак, како и другите експерти, таа верува дека треба да ги „полните батериите“ на свеж воздух секој ден. Проблемите со менталното здравје главно произлегуваат од неисполнување на нашите основни потреби. Ако престојуваме премногу долго време затворени дома тоа значи дека немаме пристап до некои работи што ни требаат - и не само што ќе страда ментално, туку последици ќе трпи и физичкото здравје.
Како што вели Даниелс, физичката активност е клучна за менталното и физичкото здравје, бидејќи ни помага да се ослободиме од стресот и вознемиреноста, а исто така ослободува ендорфин и не прави поспособни да одговориме на евентуалната инфекција.
Исто така, многу е важно, колку и да е потешко, да го одржите оној контакт „лице в лице“ барем со луѓето од вашите најтесни кругови.
Ние сме социјални суштества на кои тоа им е потребно, но друга причина е што разговорот со другите ни дава нова перспектива за одредени ситуации. Колку подолго поминувате дома, толку повеќе ќе се фокусирате на некои од вашите грижи и проблеми, а тоа не го одвлекува вниманието од целата ситуација.
Даниелс нагласува дека рамнотежата е важна.
„Ако другите премногу ве ‘напнуваат’ да излезете од дома, а вие не сакате, тоа може да има спротивен ефект и менталното здравје може да ви се влоши. Затоа, преземете мали чекори, ако сте долго време дома, одете на кратка прошетка. Зголемувајте го темпото со тек на време. Најдете рамнотежа помеѓу тоа да бидете затворени во четири ѕида и да излегувате надвор.“
