Претходната година беше полна со предизвици и непредвидливи работи поради пандемијата со коронавирусот, но тоа не беше пречка за група млади луѓе од Куманово да ги остварат нивните соништа. Студентот Николај Павловски, кој инаку студира во Русија, во партнерство со Марко Јовановски и десетици млади, го снимија долгометражниот филм „Приказ“.
Николај Павловски презеде сериозен подвиг за да го сними овој филм кој трае 150 минути и е снимен во време на пандемија, со сите ограничувања и мерки на претпазливост. Станува збор за психолошки трилер драма кој се случува во време на пандемија.
Актерската екипа брои 20 актери и уште 20 лица во продукција. Филмот „Приказ“ е сниман на повеќе локации низ Куманово, Крива Паланка, Охрид, Струга и во околините на овие градови. Иако аплицирале за финансиска поддршка во Министерството за култура, истата не ја добиле, но добиле поддршка од Општина Куманово и градоначалникот Максим Димитриевски кои обезбедиле простории за снимање и реквизити.
Авторската музика на „Приказ“ е на Јован Цветковиќ, и авторски песни чиј автор е Јаков Мициќ, познат како Керала.
Павловски вели дека идејата за снимање филм и впуштање во ваков проект дошла сосема спонтано.
„Водевме еден разговор преку телефон јас и Марко Јовановски и буквално додека зборувавме дојдовме до смислување на кратка приказна која подоцна ни беше водич за пишување сценарио. Се разбира, јас и мојот колега Марко, неколку години се занимаваме со аматерски филм, меѓутоа сега се решивме на ваков поголем и решителен чекор, да изработиме долгометражен игран филм“, вели тој.
Тој вели дека им било уште поинтересно што филмот е снимен во време на пандемија, им претставувало дополнителен предизвик за снимање, но ги почитувале сите мерки и затоа ниту еден од екипата не се заразил за време на снимањето.
Во филмот се зборува на кумановски дијалект за да биде поавтентично заради самото дејство во филмот бидејќи и тоа се случува во Куманово, вели Павловски.
Екипата е составена од 20 глумци од различни етнички заедници.