Ризикот бремените жени да родат мртво бебе е двојно поголем од оној на здравите трудници, покажа едно американско истражување.
Анализата на американскиот Центар за контрола и превенција на болести (CDC) се заснова на база на податоци на болници во САД и опфаќа 1,2 милиони породувања помеѓу март 2020 година и септември 2021 година.
Генерално, мртвородените деца сѐ уште се многу ретки - имало 8.154, или 0,65 отсто.
Меѓутоа, откако статистичките методи исклучија други варијабли кои би можеле да влијаат на резултатите, беше откриено дека кај мајките позитивни на COVID-19, веројатноста за мртвородено бебе пред појавата на делта варијантата била 1,47 пати почеста, а по појавата на делта 4,04 пати почеста.
Вкупниот ризик за бремените жени со ковид беше 1,9 пати поголем отколку за бремените жени кои не боледувале од оваа болест.
Во случаи кога трудницата боледувала од ковид, состојби како што се висок крвен притисок, повеќеплодна бременост, одвојување на плацентата од матката, лошо снабдување со крв што доведува до шок, сепса, заболени бели дробови или потреба да се стави респиратор, го зголемиле ризикот мајката да роди мртво дете.
„Постоечката анализа се надоврзува на зголемениот број докази дека COVID-19 е поврзан со зголемен ризик од раѓање на мртво дете“, напишаа авторите.
Иако ова е студијата која досега ја утврди најсилната врска помеѓу COVID-19 и мртвородени деца, научниците бараат понатамошно истражување за улогата на болеста во компликациите поврзани со раѓањето.
