Необјаснивите случаи на тежок хепатитис пријавен кај скоро 400 деца во светот би можеле да бидат последица од низа промени во организмот поттикнати од непрепознаена зараза со коронавирусот, велат научници.
Кај децата кои прележале COVID-19 е забележан значително повисок ризик од дисфункција на црниот дроб по одредено време, покажаа резултати од студија објавена на medRxiv, а која сè уште нема поминато низ стручна рецензија.
Забележано е дека родителите на повеќето деца со акутен хепатитис, ретка болест во таа возрасна граница, претходно не пријавиле прележана инфекција со SARS-CoV-2. Утврдено е дека повеќето заболени биле заразени со аденовирус наречен 41F, а во медицината не е познато дека вирусот го напаѓа црниот дроб.
Можно е заболените деца, а повеќето не биле вакцинирани поради возраста, да имале благи или асимптоматски инфекции со ковид, а кои минале незабележано, претпоставуваат научниците во студија објавена во The Lancet Gastroenterology & Hepatology.
Ако нивната претпоставка е точна, остатоци од коронавирусот кои се задржуваат во гастроинтестиналниот тракт кај децата би можеле да го поттикнат имуниот систем на претерана реакција на аденовирус 41F, па голема количина на протеини на крајот можат да го оштетат црниот дроб.
„Препорачуваме децата со акутен хепатитис да испитаат присутност на SARS-CoV-2 во столицата и да се обрне внимание на останатите сигнали кои упатуваат на оштетување на црниот дроб бидејќи шилестиот протеин на коронавирусот го прави имуниот систем претерано чувствителен“, велат тие.
