Холандската полиција употреби водени топови за разбивање на протестите организирани поради рестриктивните мерки против коронавирусот во центарот на Амстердам и уапси повеќе од 100 лица поради фрлање камења и употреба на пиротехнички средства.
Протестот се случи еден ден откако Владата воведе полициски час, првпат по Втората светска војна.
Меѓу демонстрантите имаше и сопственици на ресторани кои се спротивставуваат на локдаунот.
Протест се одржа и во саботата вечерта, кога беа уапсени 25 лица низ целата земја и беа изречени 3.600 казни за кршење на полицискиот час.
Полицијата во Ајндховен исто така употреби водени топови и солзавец против стотици демонстранти и предупреди да се избегнува центарот на градот.
Во саботата вечерта, во текот на првата вечер од полицискиот час, демонстрантите запалија лабораторија за тестирање на коронавирусот во холандското рибарско село Урк и фрлаа петарди.
