Бомбашкиот напад по концертот на Аријана Гранде во Манчестер завчеравечер беше, како што рече британската премиерка Тереза Меј, сведоштво за најлошото од човештвото. Но во најлошото, се гледа и најдоброто во луѓето.
Пример за тоа е Стивен Џонс, бездомник кој се нашол во близина на арената каде се случи крвавиот инцидент.
Во интервју за ITV News Џонс опиша како побрзал да им помогне на повредените откако слушнал силна експлозија за која прво мислел дека е огномет.
„Тоа што сум бездомник не значи дека немам срце и дека не сум човек“, вели тој.
„Едноставно инстиктот те води да одиш и да помогнеш кога некому му треба помош, а тоа беа деца, имаше многу деца, облеани во крв, врескаа и плачеа.“
Тој зборуваше и како ѝ ги држел нозете на една жена за да не искрвари и како вадел клинци и деланки од лицата на деца повредени во нападот.
„Ѝ ги држевме нозете нагоре бидејќи мислевме дека ќе искрвари до смрт“, рече тој. „Моравме да направиме нешто, мораш да помогнеш, ако не помогнев немаше да можам да живеам со себе.“
Многу луѓе на Twitter го пофалија Џонс за неговата пожртвуваност и човечност и предложија да му се помогне да најде сместување или работа.
Дејвид Саливан, ко-претседавач на фудбалскиот клум Вест Хем, и неговиот син успеаја да го најдат и му понудија сместување за 6 месеци додека успее да се крене на нозе.
Преку кампањата JustGiving беа собрани 29.500 фунти за помош за Џонс.
