Светската шампионка во биатлон, Жулиа Симон (27) од Франција е ослободена од полициски притвор како дел од истрагата за кражба на кредитни картички.
Минатогодишната победничка на Светскиот куп беше приведена во вторникот, откако од страна на нејзината колешка од репрезентацијата, Жјустин Брезаз-Буше, беа поднесени две пријави против неа.
Буше ја обвини 27-годишната Симон дека незаконски ја користела нејзината банкарска картичка за купување преку интернет во износ од „приближно 2.300 евра“, пишува Bild.
Браијаз-Буше, наводно, ги поднела обвиненијата минатата година, но случајот се појавил во јавноста дури на почетокот на летото, кога за него пишуваше францускиот весник L'Équipe.
Меѓу другото, биле купени и производи од брендот GoPro кои потоа биле доставени на домашната адреса на Симон во Албервил.
„Има купувања кои се направени со кредитна картичка со моето име, но денес и јас сум жртва на оваа ситуација. Моето име беше користено без мое знаење“, рече Жулиа Симон во интервју за Le Dauphiné libéré во август 2023 година.
Новата сезона во биатлон започнува за нешто помалку од еден месец (25 ноември), а првата трка е во Естерсунд, Шведска. Симон планира да ја започне и покрај бројните обвинувања.
