Светската здравствена организација тврди дека главната состојка во медицинскиот канабис не предизвикува зависност и не е токсична. Научниците со месеци го проучувале канабидиолот, состојка на марихуаната која не е психоактивна и често се користи во медицински цели, а најчесто доаѓа во облик на масло или капсула.
Токму врз основа на тоа истражување, Светската здравствена организација објави дека состојката која содржи до 40 отсто екстракт од марихуана не е токсична и не предизвикува зависност.
Стручниот одбор за зависност од дроги заклучил дека нема докази дека состојката канабидиол предизвикува проблеми со здравјето.
Покрај тоа, откриле дека канабидиолот може да биде добар за лечење на епилепсија и „бројни други медицински состојби“.
Иако извештајот бил објавен во ноември, внимание привлече оваа недела откако Светската здравствена организација објави конкретни препораки.
Кога станува збор за набавка и легализација, препорачан е нов пристап. Меѓутоа, научниците истакнуваат дека извештајот не значи дека тие препорачуваат употреба на канабидиол.
Соопштено е дека за канабидиол не треба контрола или регулација на меѓународно ниво, туку треба да се дозволи секоја држава тоа да го решава посебно.
„Тоа значи дека неговото производство и употреба во одредени цели, како што се лечење и истражување, не би требало да биде забрането, бидејќи Светската здравствена организација не пронајде докази околу евентуалните штетни ефекти на канабидиолот“, изјави гласноговорник на организацијата.
Попрецизни препораки и заклучоци би требало да бидат објавени во мај следната година.
