Светската здравствена организација (СЗО) не им препорачува на државите да издадат „имунитетски пасоши“ на оние кои се опоравиле од COVID-19, но размислува да воведе електронски сертификати за вакцинација, како што се оние што ги развива во соработка со Естонија.
Естонија и агенцијата на ООН започнаа пилот проект во октомври за дигитален сертификат за вакцинација како дел од иницијативата COVAX, чија цел е да се промовира вакцинацијата против коронавирус во земјите во развој.
Почетокот на вакцинацијата е сѐ поблизу откако Велика Британија ја одобри вакцината на Pfizer завчера, а Moderna и AstraZeneca побараа вонредно регулаторно одобрување во САД и ЕУ.
„Интензивно размислуваме како да ја искористиме технологијата како одговор на пандемијата и еден начин е е-потврда за примена вакцина “, рече Сидарта Дата, шеф на одделението на СЗО за болести што можат да се спречат со вакцини.
Естонија започна со тестирање на „дигиталниот имунитетски пасош“ на почетокот на оваа година за да ги следи луѓето кои се опоравиле од COVID-19 и имаат одреден имунитет, иако сè уште е под знак прашалник дали се заштитени и колку долго.
Друг висок службеник на СЗО, Кетрин Смолвуд, вчера изјави дека агенцијата е против тие пасоши како средство за нормализирање на патувањата во странство.
„Ние не препорачуваме ‘имунитетски пасоши’, ниту тестирање како средства за спречување на прекугранично пренесување на коронавирус“, рече Смолвуд, повикувајќи ги државите да ги засноваат препораките за патувања на податоците за пренос на COVID-19.
Таа додаде дека брзите тестови, врз основа на кои некои авиокомпаниите одлучуваат кои патници ќе се качат во авионот, а кои не, се „помалку погоден“ начин за продолжување на меѓународните патувања.
