Светската здравствена организација (СЗО) ќе свика состанок на членовите за да разговара за стратегиите за борба против новиот, заразен сој на коронавирус што се појави во Велика Британија, изјави денеска шефот на СЗО за Европа.
Тој не го прецизираше датумот на состанокот.
„Ограничувањето на патувањата за борба против ширењето на вирусот е мудро додека не добиеме повеќе информации. Синџирите за снабдување со најосновните производи и неопходните патувања треба да продолжат да бидат на располагање“, рече регионалниот директор на СЗО Ханс Клуж на Twitter, повикувајќи на засилени превентивни мерки.
Женевското тело вчера соопшти дека новиот сој на коронавирус откриен во Велика Британија, за кој се покажа дека се шири побрзо од претходната варијанта, „не е надвор од контрола“.
Марија Ван Керхове, технички менаџер на СЗО за COVID-19, рече дека новиот сој на коронавирус, иако позаразен, не предизвикува потешки форми на болеста или повеќе смртни случаи, повикувајќи се на британски анализи.
СЗО исто така објави дека наскоро очекува повеќе детали за можното влијание на новиот многу заразен сој на коронавирус, додека голем број земји ги затворија границите за патување од Велика Британија од страв од неговото ширење.
Новиот сој што ја вознемири Велика Британија е откриен и кај лица во Австралија, Исланд, Италија и Холандија, а имало и неколку случаи во Данска.
СЗО посочи дека ова е нормална етапа во еволуцијата на пандемијата.
Во изјавата објавена вчера, СЗО повтори дека сè уште нема доволно информации за да се утврди дали новиот сој може да влијае на ефективноста на вакцината и рече дека тестирањата се во тек.
