Тајните разузнавачки информации што претседателот на САД, Доналд Трамп, ги цитирал пред рускиот шеф на дипломатијата Сергеј Лавров за време на состанокот во Белата куќа минатата недела биле добиени од Израел, пишува „Њујорк Тајмс“, повикувајќи се на две американски официјални лица.
Трамп на Лавров му откри разузнавачки информации за терористички планови на Исламска држава, а барем некои од нив САД ги добиле од Израел, соопштиле еден поранешен и еден сегашен американски официјален претставник.
Израел претходно ги повикал САД внимателно да се справат со овие разузнавачки податоци, објави „Њујорк тајмс“. Според наодите што ги објави весникот на својот сајт, откривањето на чувствителните податоци на Русија би можело да им наштети на односите меѓу САД и Израел, особено ако Русија ги проследи до Иран, најголема закана за Израел на Блискиот Исток.
Израел е најважниот сојузник на САД и главен извор на разузнавачки информации на Блискиот Исток. Израелските официјални лица не потврдуваат дека оваа земја била извор на информациите што Трамп ги сподели со Лавров.