Берзанските индекси на Волстрит пораснаа во средата, благодарение на закрепнувањето на цените на акциите во технолошкиот сектор, но тргувањето беше претпазливо пред новите извештаи за инфлацијата во САД, што може да влијае на очекувањата за каматните стапки.
Dow Jones зајакна 0,45 отсто, на 37.695 поени, додека S&P 500 порасна за 0,57 отсто, на 4.783 поени, а индексот Nasdaq 0,75 отсто, на 14.969 поени.
Растот на S&P 500 и индексот Nasdaq главно се должи на порастот на цените на акциите на технолошките гиганти, како Microsoft, Meta Platforms и Nvidia, кои значително паднаа минатата недела.
Но, тргувањето беше претпазливо, како што е наведено од потпросечниот обем на тргување, бидејќи инвеститорите не сакаат да преземат премногу ризик пред извештајот што ќе покаже како се движела инфлацијата во САД во декември.
Извештајот за потрошувачките цени ќе биде објавен во четврток, а за цените на производителите во петок.
Овие извештаи би можело да имаат значително влијание врз очекувањата за каматните стапки од американската централна банка.
На крајот на минатата година, цените на акциите нагло пораснаа бидејќи инвеститорите се надеваа на агресивно намалување на стапката од страна на ФЕД, почнувајќи од март.
Но, на почетокот на оваа година, по објавувањето на записникот од минатогодишната седница на ФЕД, ваквите шпекулации стивнаа.
Сега пазарот на пари проценува дека има околу 65 отсто шанси ФЕД да ги намали каматните стапки за 0,25 процентни поени во март, додека пред десет дена овие шанси беа речиси 80 отсто.
Претседателот на филијалата на ФЕД во Њујорк, Џон Вилијамс, вчера изјави дека се уште е рано да се намалат каматните стапки бидејќи инфлацијата се уште е над целното ниво од 2 отсто.
Внимателни се и инвеститорите поради фактот што на крајот на неделата започнува сезоната за објавување на кварталните деловни резултати на компаниите, што значително ќе влијае на насоката на пазарот во наредните недели.
„Пазарот се обидува да процени што да очекува во 2024 година во однос на каматните стапки и корпоративната заработка, и дали тоа може да го оправда силен раст на цените на акциите во ноември и декември“, рече Сем Стовал, стратег во CFRA Research.
Внимателно вчера се тргуваше и на европските берзи. Лондонскиот FTSE индекс ослабе за 0,42 отсто, на 7.651 поен, а париски CAC за 0,01 отсто, на 7.426 поени. Франкфуртски DAX зајакна, пак, за 0,01 отсто, на 16.689 поени.