Екипите на Тиквеш и Пелистер изборија пласман во осминафиналето од новата сезона во Купот на Македонија откако синоќа ги елиминираа своите противници.
Тиквеш имаше лесна задача со третолигашот Љуботен и славеше со убедливи 5:1. Иако гостин, Тиквеш играше пред своите гледачи во Кавадарци во договор со тетовчани бидејќи Љуботен нема стадион кој ги задоволува критериумите за настап во купот. Домаќините одморија неколку стандардни играчи како Ванче Шиков, Ѓорѓи Мојсов и Александар Вареловски давајќи им шанса на резервисти.
Далеку поинтересно беше во Пехчево каде во неизвесен натпревар битолски Пелистер славеше над Кит-Го дури по изведувањето на пенали. Домаќините го отворија резултатот на девет минути пред крајот, а кога помислија дека ја имаат победата битолачни израмнија во судиското надополнување по што натпреварот влезе во пенал-рулет.
И двете екипи беа непогрешливи пеналџии сѐ до петтата серија кога Синев промаши кај домаќините праќајќи го Пелистер во осминафиналето.
Љуботен - Тиквеш 1:5
41′ Роберт Димитриески – 8′ Лазар Пеев, 21′ Андреј Лазаров, 47′, 62′ Марјан Ристовски, 88′ Роберт Митев
Кит-Го - Пелистер 1:1 (5:6 пен.)
81′ Андреј Симевски – 90’+2 Игор Момировски
пенали:
✓ Марјан Ташков - ✓ Благоја Љамчевски
✓ Андреј Симевски - ✓ Иве Трифуновски
✓ Бојан Рајков - ✓ Дарко Анѓелески
✓ Бобан Тиквешанац - ✓ Сашо Шопоски
✗ Иле Синев - ✓ Филип Бошковски
Завчера Брегалница избори пласман во осминафиналето откако забележа рекордна победа од 22:0 над Ново Црнилиште, додека останатите натпревари се играа денес.
