Селекторот на кошаркарската репрезентација по поразот од Русија вели дека играчите биде деконцентрирани поради изненадувачката победа на Естонија над Италија.
Македонија синоќа запиша нов пораз во квалификациите за пласман на ЕвроБаскетот 2022 откако од Русија загуби со 77:94 и ја продолжи серијата без победа. Дополнително се искомпликуваа работите за нас поради победата на Естонија над Италија, па сега не само една, туку потребни ни се две победи на последните два натпревара утре и задутре.
„Тешко беше да се сконцентрираме и психолошки да се подготвиме, не толку во однос на нашиот противник, колку што нè изненади првиот натпревар меѓу Естонија и Италија. Мислевме дека одлучувачки ќе биде нашиот дуел со Естонија, но додека се подготвувавме во соблекувалната, ја дознавме лошата вест, дека ќе ни требаат две победи за да се пласираме на Европското првенство“, иозјави селекторот Александар Тодоров.
„Втор важен момент беа скоковите, а трет повредата на Дамјан Стојановски поради што моравме да ротираме тројца кошаркари на таа позиција во преостанатите 36 минути. Противникот имаше 24 скока повеќе од нас, 17 само во првото полувреме кога ја оствари клучната разлика“.
Македонските кошаркари денеска имаат слободен ден, малку да одморат пред последните два натпревара.
„Без оглед на сè, мораме да ги кренеме главите и да продолжиме понатаму. Имаме слободен ден, а потоа два натпревара во два дена кои ќе одлучат. Играме за нашата земја и тоа е најголема мотивација што може да ја добиеме. За жал, лошо ги почнавме овие квалификации и сега поради еден лош натпревар го губиме целиот циклус“, заврши Тодоров.
Утре од 13 часот играме против Италија, а потоа в понеделник од 15 часот против Естонија. Доколку утре не оствариме победа тогаш последниот натпревар нема да има никакво значење.
