Париз, 21 јули 2018 (МИА) – Носителот на жолтата маица Герајнт Томас од тимот Скај изјави дека не му пречи тоа што дел од публиката го исвиркала долж 13-тата етапа.
Меѓутоа, британскиот велосипедист упати апел до гледачите да им овозможат безбеден премин на натпреварувачите.
- Ги чув свирежите уште на стартот, но ги игнорирав. Како што реков, ако негодувањето е вербално и не влијае на трката, тогаш е во ред, истакна Томас .
Тимот Скај воопшто не е популарен во Франција, а неговата доминација на Тур де Франс потсетува на периодот кога Ленс Амстронг владееше со трката.
- Подобро да сум на подиумот и да ме исвиркуваат, отколку да сум во автобусот и да ме сожалуваат, наведе Томас.
Во моментов Томас е прв на трката и има предност од минута и 39 секунди во однос на својот тимски колега и сонародник Крис Фрум. Токму Фрум, кој е четрикратен освојувач на Тур де Франс, е главна мета на француските навивачи, бидејќи само неколку дена пред стартот на трката беше ослободен од обвинувањата за допинг.
