Веројатно сте забележале дека локалните продавници имаат известувања да носите ракавици и маска додека пазарите, да не фаќате предмети па да ги враќате назад на полица, да ги дезинфицирате рацете пред влез во продавницата и слично. Дали ова има смисла, особено кога станува збор за пластичните ракавици, дали навистина ќе нè заштитат и како да ги користиме?
Еве што велат за тоа експертите.
„За јавноста општо не се препорачуваат пластични ракавици како начин за заштита од COVID-19. Хигиената на раце и респираторниот систем се приоритет пред носењето пластични ракавици или маски за лице“, вели д-р Дијана Гал за Metro.
Таа истакнува дека таквиот облик на заштитна опрема е корисен единствено во болнички услови каде здравствените работници се во директен контакт со телесни течности и вируси.
„Во болниците пластичните ракавици се фрлаат по преглед на секој пациент. Повеќето луѓе не го следат строгиот протокол па постои и ризик од носење заштитни ракавици во јавност“, вели таа.
Носењето еднократни ракавици може да разбуди лажно чувство на заштита и да доведе до занемарување на хигиената на рацете. Објаснува дека на ракавиците треба да се гледа како на кожа. Со други зборови, ако ги допирате површините со ракавици на рацете, а потоа го допрете лицето, може да пренесете коронавирус.
„Ако цел ден носите ист пар ракавици, одите во различни продавници и допирате различни површини се изложувате на поголем ризик отколку редовно да ги миете рацете“, предупредува докторката.
Ракавиците треба да ги фрлите по секое користење или допирање нови површини, никако да ги миете.
„Еднократните ракавици од латекс не се мијат, не се дизајнирани за тоа и многу се тенки“, вели д-р Џузепе Арагона.
Токму затоа што се тенки, еднократните ракавици може да се скинат. Покрај сето наведено, дури и ако носите медицински ракавици, може да се заразите со коронавирусот на поинаков начин.
„COVID-19 се шири преку капки, што значи дека е доволно некој заразен да кивне или да се закашла во ваш правец. Ако ги вдишите капките доаѓа до ширење на заразата. Иако ракавиците можат да ве заштитат да не дојдете со дланките во контакт со капките, тие ќе се задржат на површината на ракавиците и ќе преживеат освен ако не ги фрлите и веднаш потоа да ги измиете рацете“, додава д-р Рос Пери.
Затоа експертите се сложни, најдобра превенција е честото миење раце со сапун и топла вода и користење средства за дезинфекција на раце.
