УЕФА потврди дека отворила дисциплинска постапка против Кристијано Роналдо, откако тој синоќа доби црвен картон во победата на Јувентус над Валенсија во Лигата на шампионите.
Суперѕвездата на Старата Дама доби контроверзно исклучување во 29 минута, во рамките на првиот натпревар од Лигата на шампионите, после дуел со противничкиот играч Муриљо.
На Ронадо му беше покажан директен црвен картон откако подигна рака на Муриљо, кој потоа падна на земјата, а потоа Роналдо го фати за коса.
Ова беше воедно и првиот црвен картон на Португалецот во рамките на Лигата на шампионите.
После консултација со своите асистенти, судијата Феликс Брих го исклучи Роналдо, кој ја напушти „Местаља“ во солзи.
Црвениот картон значи автоматски суспензија на еден натпревар за 33-годишниот Роналдо, но тој може да се соочи и со поголема казна и да го пропушти враќањето на „Олд Трафорд“ против Манчестер Јунајтед на 23 октомври, кога Јуве ќе гостува во Манчестер во третото коло од групата H.
На 27 септември случајот на Роналдо ќе биде преслушан од страна на комисијата на УЕФА за контрола, етика и дисциплина.