Втор пратеник во Европскиот парламент е уапсен како дел од кривична истрага за наводно подмитување, корупција и перење пари во Европскиот парламент, пишува The Guardian. Станува збор за скандал во кој политичари од Европскиот парламент добивале пари од владите на Катар и Мароко.
Марк Тарабела (59) од Белгија бил приведен на сослушување откако полицијата околу шест часот утринава пристигнала во неговиот дом, пишува белгискиот печат. Тарабела претходно се изјасни за невин.
Во соопштението на белгискиот сојузен обвинител се наведува дека пратеникот во Европскиот парламент идентификуван како М.Т. бил уапсен за распит и дека наскоро би можел да се појави пред истражен судија. Се вели дека полицијата го пребарала неговиот сеф во градот Лиеж, како и неколку канцеларии во градското собрание на Антис, мала област во источна Белгија каде Тарабела е градоначалник речиси 30 години.
Тој е вториот европратеник кој е приведен поради истрага за наводни плаќања во готовина за влијание од владите на Катар и Мароко. Во декември, поранешната потпретседателка на Европскиот парламент, Ева Каили, беше уапсена за време на серија рации во кои полицијата конфискуваше готовина во вкупна вредност од речиси 1,5 милиони евра.
Минатиот месец беше претресен домот на Тарабела во Брисел, а минатата недела Европскиот парламент му го укина имунитетот на барање на белгискиот федерален обвинител. Инспекторите го сомничат дека примил готовински плаќања од 120.000 до 140.000 евра за да лобира за трета земја, се вели во извештајот составен од комисијата за правни прашања на Европскиот парламент.
Инспекторите веруваат дека тој е близок соработник на Пјер Антонио Панцери, поранешен италијански европратеник за кој се верува дека е на чело на корупциска мрежа. Панцери неодамна склучи договор за признавање вина со обвинителите во кој се согласи да обезбеди информации во замена за намалена затворска казна.
Панцери и Каили беа уапсени во декември заедно со поранешниот помошник на Панцери, Франческо Џорџи и шефот на невладината организација со седиште во Брисел, Николо Фига-Таламанка. Сите четворица се задржани во истражен затвор. Каили и Фига-Таламанка негираа вина, додека адвокатот на Џорџи одби да коментира.
Тарабела е член на Европскиот парламент од 2004 година, со двегодишна пауза помеѓу 2007 и 2009 година кога беше министер во регионалната влада на Валонија, источниот франкофонски дел на Белгија. Тој беше член на делегацијата на Европскиот парламент за односи со Арапскиот Полуостров, во кој е вклучен и Катар. По избивањето на скандалот, тој поднесе оставка од таа функција и се откажа од членството во клубот на социјалистите и демократите во парламентот.
Еден месец пред избивањето на скандалот, Тарабела учествуваше на дебата во парламентарниот поткомитет за човекови права за Катар и Светското првенство.
Тарабела, кој не беше член на таа комисија, ги критикуваше колегите европратеници кои го привлекоа вниманието на смртта на работниците мигранти кои градеа инфраструктура за Светското првенство во Катар. Тој ги обвини дека ги засноваат своите критики на застарени информации и тврдеше дека ниту Кина ниту Русија не се соочиле со такви проблеми кога биле домаќини на меѓународни спортски настани.
„Ние го немавме сето ова кога зборувавме за Сочи или Пекинг. Вие всушност не го почитувате патот на Катар“, рече тој кога ги повика европратениците.
