Објект на голема надморска височина беше соборен синоќа над Алјаска, потврди Белата куќа.
Портпаролот Џон Кирби рече дека објектот бил „со големина на мал автомобил“ и бил над ретко населена област кога се урнал. Претседателот Џо Бајден донесе одлука за соборување на објектот од непознато потекло, рече Кирби.
Кирби во Белата куќа изјави дека новиот објект над Алјаска се движел на височина малку поголема од 12.000 метри и можел да претставува закана за цивилните авиони. Тој додаде дека површината на остатоците од овој нов објект е „многу, многу помала од балонот соборен минатата недела во близина на брегот на Јужна Каролина“.
Тој исто така рече дека разузнавачите во четвртокот вечерта дознале за нов објект над територијата на САД и дека борбен авион се приближил до објектот и проценил дека е беспилотен, како и дека оваа информација му била пренесена на Бајден пред одлуката за негово соборување.
Да потсетиме, минатата сабота, САД соборија кинески балон над своите територијални води, чија големина според американските власти беше проценета на приближно три автобуси. Објектот кој вчера беше урнат од Белата куќа сè уште не се нарекува балон и не ѝ се припишува на Кина или на некој друг.
„Ова го нарекуваме објект бидејќи тоа е најдобриот опис што го имаме во моментов. Не знаеме кој го поседува - дали е во државна или корпоративна или приватна сопственост, едноставно не знаеме“, рече Кирби.
„Немаме никакви информации за да ја потврдиме целта на овој објект. Очекуваме да можеме да ги извлечеме остатоците бидејќи паднаа не само во нашиот територијален простор, туку и на она што ние веруваме дека е ледена површина“, рече Кирби, додавајќи дека по испитувањето на шутот требало да се знаат повеќе информации за објектот.
Претседателот Џо Бајден изјави за CNN дека соборувањето на „објект на голема височина“ што лебди над Алјаска во петокот „беше успешно“.
Откако објектот првпат беше откриен во четвртокот, борбени авиони Ф-35 беа испратени да го истражат, изјави претставник на американскиот Пентагон. Борбени авиони, исто така, повторно го пресретнаа објектот во петокот наутро.
„Успеавме да собереме неколку ловци околу него пред да биде дадена наредбата за соборување и пилотите да проценат дека е без екипаж“, додаде Кирби.
Борбен авион Ф-22 од заедничката база Елмендорф-Ричардсон, Алјаска го собори објектот „во 13:45 часот по средноевропско време, во рамките на суверениот воздушен простор на САД над територијалните води на САД“, изјави за печатот портпаролот на Пентагон, генерал-мајор Пат Рајдер.
Тој рече дека објектот бил соборен од Ф-22 со AIM-9X, истиот тип на проектил што бил користен за соборување на кинескиот балон. Се чини дека објектот нема никаква опрема за надзор, според американскиот официјален претставник, што би го направило и помал и можеби помалку софистициран од кинескиот балон соборен минатиот викенд.
Воени претставници рекоа дека веруваат дека предметот не е имот на војската или владата на САД.
