Англиските судии Дарен Ингланд и Ден Кук, кои беа ВАР судии на натпреварот од Премиер лигата меѓу Тотенхем и Ливерпул, ја дознаа казната за грабежот што му го направија на гостинскиот тим.
Ингланд и Кук му поништија чист гол на Ливерпул во 34. минута при резултат 0:0.
Мохамед Салах фантастично го проигра Луис Диас, кој излезе сам пред Гиљермо Викарио и постигна гол, но помошниот судија потоа го подигна знаменцето и означи офсајд. Главниот судија Сајмон Хупер по само 40 секунди разговор со колегите во ВАР му досуди офсајд на напаѓачот на Ливерпул и му го поништи голот, иако и со голо око беше очигледно дека нема офсајд.
Грешката настана затоа што во ВАР собата мислеле дека голот е признат на теренот, а по проверката утврдиле дека нема офсајд и го известиле судијата дека „ја донел вистинската одлука“ по што тој автоматски останал на својата одлука што претходно ја донел, односно дека има офсајд.
На крајот Ливерпул беше поразен со 2:1, а Ингланд и Кук добија суспензија од два дена поради пропустот, што може „Црвените“ да ги чини титула.
Судиската организација на Премиер лигата (ПГМОЛ) соопшти дека Ингланд и Кук се отстранети од делегирањето за натпреварите Нотингем Форест - Брентфорд, кој се одиграа синоќа, и Фулам - Челси кои играат вечерва.
