Промоцијата на првата стихозбирка на младиот поет Васил Ханџиски ќе се одржи в четврток, 20 јули во кафе-книжарница ,,Буква” со почеток во 20:30 ч.
Промотор на стихозбирката ќе биде Андреј Медиќ Лазаревски, а пред официјалниот почеток на промоцијата ќе има DJ сет на Емили.
„Дебитантската поетска збирка на младиот поет Васил Ханџиски е сложувалка од теми посветени на првите искуства на секој млад човек, првите љубови и разделби, првите средби со градските ликови, фрустрациите од општеството. Поделена во пет делови, стихозбирката ‘Сложувалка’ е рефлексија на љубовта, домот и неговото напуштање, градовите и луѓето во нив, странствувањето и осаменоста, љубовта кон девојката, но и кон ракијата. Авторот ги поставува стандардните младешки прашања поврзани со овие теми, се осврнува на личните чувства, но и во неколку наврати упатува критика кон ова ‘општество што тоне во бездна’. Почнувајќи со алкохолот, минувајќи низ љубовта и домот, а завршува со себепромислување и опишување на другите, оваа збирка е своевидна панорама на она што значи младоста – јас во себе и сè околу мене“, вели Медиќ Лазаревски.
Стихозбирката е во издание на издавачката куќа „ПНВ Публикации“.
