Транссексуалците можe да бидат кумови за крштавање и венчавка и можат и самите да се крстат, соопшти денеска Ватикан, одговарајќи на прашања на бискупите.
Дикастеријата за доктрина на верата не одговори јасно на прашањето дали истополовите парови можат да крстат посвоено дете или дете родено од сурогат мајка.
Во јули, бискупот Хозе Негри од Санто Амаро, Бразил, испрати шест прашања до телото на Ватикан за ЛГБТИ+ луѓето и нивното учество во светите тајни на крштевањето и бракот.
Трите страници прашања и одговори беа потпишани од шефот на дикастеријата, аргентинскиот кардинал Виктор Мануел Фернандес, а одобрени од папата Франциско на 31 октомври. Тие денеска беа објавени на порталот на дикастеријата на италијански јазик.
Одговарајќи на прашањето дали транссексуалците би можеле да се крстат, од дикастеријата одговориле дека можат под одредени услови и доколку нема ризик од јавен скандал или збунување на верниците. Дикастеријата, исто така, одговори дека транссексуалците можат да бидат кумови по дискреција на локалниот свештеник и кумови на бракот, но локалниот свештеник треба да биде пасторски мудар кога ја донесува одлуката.
Личност во истополова врска може да биде кум на венчавка, одговориле од дикастеријата, повикувајќи се на канонскиот закон што не го забранува тоа. Одговорот е помалку јасен кога станува збор за лицата во истополови врски и нивната улога во крштавките.
Бразилскиот бискуп прашал и дали истополовиот пар кој посвоил дете или го добил со помош на сурогат мајка може да го крсти тоа дете. Дикастеријата одговорила дека во тој случај мора да постои основана надеж дека детето ќе се образува во католичка вера.
Одговорот на прашањето дали личноста во истополова врска може да биде кум е подеднакво нејасен. Одговорот беше дека оваа личност мора да води живот во согласност со верата.
