Православните христијани, чии цркви го користат Јулијанскиот календар, вечер ќе ја пречекаат Јулијанската Нова година, која почнува утре на празникот Василица. Но, празнуваат и други народи ширум светот кои се од друга религија.
Многу македонски семејства Василица ја празнуваат како домашна слава, а оние кои го носат името на Свети Василиј Велики, како Васил, Васко, Васе, Васка…, го слават својот именден. На семејната трпеза се крши погача со паричка, а се верува дека на оној што ќе му падне, годината ќе му биде среќна и бериќетна.
По повод православната Нова година и празникот Обрезание Господово и Свети Василиј Велики, утре во храмовите на Македонската православна црква ќе биде служена света Василиева литургија. Годинава со ограничено присуство на верници поради пандемијата со коронавирусот. Ќе изостанат и традиционалните маалски огнови.
Свети Василиј Велики е еден од тројцата најголеми црковни учители од IV век. Родум бил од Цезареа во Кападокија, а завршил школо во Атина. Тој бил голем христијански филозоф, а се прославил и како епископ и заштитник на чистотата на православното учење. Свети Василиј Велики се упокоил на 14 јануари во 379 година.
Покрај Македонската православна црква, според Јулијанскиот календар, верските празници ги слават и Руската и Српската црква, Ерусалимската патријаршија и монасите на Света Гора. За разлика од нив, по Грегоријанскиот календар се водат Грчката, Бугарската, Романската, Украинската и Грузиската православна црква.
Старата Нова година од разни причини се празнува и кај народите кои не се православни. Така, овој празник се слави во Курдистан, Палестина, Јордан, Узбекистан, Азербејџан, Казахстан, Швајцарија, Велс и Шкотска, а го празнуваат и Берберите кои живеат распослани низ земјите од Северна Африка. Во Алжир, каде Берберите се бројно малцинство, е прогласен за национален празник, но поради некои причини таму се слави ден порано, на 12-ти.
