Вејн Руни, еден од најдобрите англиски фудбалери на сите времиња планира да влезе во рингот и да одработи боксерски меч со познатиот американски инфлуенсер Џејк Пол (26).
Пол за прв пат влезе во рингот пред пет години и досега се бореше со угледни имиња како Бен Аскрен, Тајрон Вудли и Андерсон Силва.
Руни (37) како тинејџер блескаше во дресот на Евертон, а со преселбата во Манчестер Јунајтед стана еден од најдобрите играчи во Премиер лигата. Со 253 гола е најдобриот стрелец во историјата на клубот од Олд Трафорд, а минатата година тренерската кариера ја започна прифаќајќи ја понудата од американскиот Д.Ц. Сепак, како што пишува Marca, славниот Англичанец е на прагот на нова кариера - боксерска.
Промоторот Еди Херн верува дека Вејн Руни може да има извонредна кариера, се разбира, кога станува збор за егзибициски натпревари. Треба да се потсети дека Руни беше познат како доста комплициран и проблематичен играч во раните години од кариерата во Евертон, но кога пристигна во Јунајтед, Алекс Фергусон го држеше под контрола и го врати на вистинскиот пат.
Можен противник на поранешниот фудбалер би бил популарниот јутјубер кој стана боксер, Џејк Пол. Вејн Руни е љубител на боксот и затоа сака да си ја проба среќата во рингот. Затоа го контактирал Херн за да побара борба.
Сепак, самиот Херн тогаш откри дека Руни и претходно барал од него да му организира борба, но дека тоа речиси секогаш го правел кога пиел и затоа не му обрнувал многу внимание. Сепак, се чини дека овојпат е поинаку и дека овојпат навистина би можело да дојде до борба.
Се очекува борбата да се одржи на легендарниот стадион „Олд Трафорд“, кој беше дом на Вејн Руни за време на неговата кариера во Манчестер Јунајтед.
