Италијанскиот фудбалер од средниот ред на ПСЖ, Марко Верати, пристигна во Доха, Катар, каде што треба да ги помине медицинските прегледи пред да потпише за клубот Ал-Араби, тврди AFP.
Долгогодишниот играч за врска на ПСЖ, 30-годишниот Верати, летово беше ставен на „црната“ листа од челниците на парискиот клуб и не сметаше на него во Лигата на шампионите.
Според сликите објавени од локалните медиуми, италијанскиот репрезентативец со 55 натпревари за „аѕурите“ пристигна во Доха во понеделникот вечерта.
„Многу сум среќен и едвај чекам да започне оваа сезона. Се надевам дека ќе имаме одлична сезона. Едвај чекам да откријам сè, стадионот, навивачите, соиграчите, тренерите“, коментираше видно насмеан и опуштен Верати по пристигнувањето на аеродромот.
Марко Верати се очекува да ги помине медицинските прегледи денеска пред да потпише со Ал-Араби, еден од клубовите во главниот град на Катар, јавува дописникот на AFP.
Условите на договорот сè уште не се познати, но медиумите пренесуваат дека се работи за трансфер вреден околу 45 милиони евра. ПСЖ допрва треба да го објави заминувањето на Италијанецот, кој им се приклучи на Парижаните во 2012 година, само една година откако францускиот клуб беше преземен од Qatar Sports Investments (QSI).
