Жителите на скопската Општина Аеродром од денеска можат да го одложат својот електронски отпад на 12 локации каде што се поставени рециклатори.
Во соработка со Нула Отпад, Аеродром е првата општина во државава која воспоставува организиран систем за собирање на електронски отпад, каде граѓаните и компаниите можат да ги одложат помалите електрични и електронски уреди од своите домови. Овој систем, треба да придонесе за намалување на опасниот отпад на улиците, дивите депонии што се создаваат покрај контејнерите и ќе влијае на подигнување на јавната свест.
„Со нови контејнери и организиран систем за собирање електричен отпад, правиме значаен исчекор во нашите напори за промоција на одржливоста и заштита на животната средина“, соопшти градоначалникот Тимчо Муцунски, кој и присуствуваше на пуштањето во употреба на првиот поставен рециклатор.
„Амбициозно чекориме на патот кон зелена, европска, чиста и одржлива општина. Од денес на 12 локации во Аеродром поставуваме инфраструктура од контејнери за фрлање на електричен и електронски отпад, која значително ќе помогне во одржувањето на чистотата во околината. Грижата за здравата и чиста животна средина е наш приоритет, а со промовирање одржливи практики и поттикнување на одговорно отстранување на електронскиот отпад, заеднички придонесуваме да се намали влијанието на овој растечки проблем, но и да продолжи заедничката грижа за почиста животна средина“.
Контејнери за одложување електронски отпад денеска беа поставени на следните локации:
- Парк на светлината
- позади Мајчин Дом
- Капитол, подземните контејнери од страната на „Дежа Ву“
- Бисер, веднаш до пазарот
- позади Тренд
- Реонски центар (до Горење)
- Ново Лисиче (зградите спроти Лиса центар)
Во наредните денови ќе бидат поставени контејнери на 8 други локации низ општината.
Во Аеродром веќе има поставено посебни контејнери од Пакомак за селектирање на пластика и стакло, додека недостасуваат повеќе од оние за хартија, кои се во мал број.
Во соседната Општина Центар жителите добиваат поени доколку пластичните шишиња и лименки ги одложат во специјалните вендинг-машини на ПОЦ.