Хокеарите на Вегас Голден Најтс се новите шампиони на НХЛ, за прв пат во својата кратка историја.
И покрај одличната серија на Флорида Пантерс во плеј-офот, кои исфрлија многу фаворизирани тимови, вклучувајќи го и најдобриот тим во регуларниот дел од сезоната - Бостон Бруинс - не издржаа повеќе од пет натпревари против моќниот Вегас.
„Златните витези“ предводени од тренерот Басиди беа доминантни во текот на целиот плеј-оф, а ништо поразлично не беше и финалната серија во која победија со вкупни 4-1.
Во последниот петти натпревар ноќеска гледавме вистински спектакл со оглед на тоа што љубителите на хокејот имаа можност да видат дури 12 гола.
Вегас победи со убедливи 9:3, а пресврт беше вториот период, односно периодот од 31. до 40. минута во кој „Витезите“ постигнаа дури пет гола и поведоа со 6:1.
Најмногу се истакна Марк Стоун со вкупно три гола, по еден во секој период. За Вегас стрелаа и Николас Хаг, Алек Мартинес, Рајли Смит, Мајк Амадио, Иван Барбашев и Николас Рој, додека за поразениот тим погодија Арон Екблад, Сем Рајнхарт и Сем Бенет.
На овој начин франшизата Голден Најтс испиша историја со стекнувањето на статусот „најмлад“ победник на Стенли купот во историјата на НХЛ. Имено, клубот од Невада постои само шест години.
Вегас Голден Најтс е основан во 2017 година, а неговата прва натпреварувачка сезона беше 2018/2019 кога веднаш приреди сензација со пласманот во финалето, но тогаш налета на силниот Вашингтон Визардс и беше поразен. Наредната испаднаа во првото коло од плеј-офот, а во третата сезона стигна до полуфиналето. Минатата сезона не успеа ниту да се пласира во плеј-офот, па резултатот оваа сезона е навистина голем подвиг.
