Германскиот произведувач на оружје Rheinmetall го претстави новиот главен борбен тенк на саем одржан во Париз.
Тенкот е претставен под името Panther KF51 и на некој начин е потсетник на германскиот тенк PzKpfw V од Втората светска војна.
Новиот тенк поседува нов топ на калибар 130 мм, оптимална врска меѓу сензорите и стрелецот. Има дигитални системи за контрола на бојното поле. Со изгледот потсетува на семејството главни борбени тенкови наречени Leopard 2, но од компанијата Rheinmetall тврдат дека станува збор за радикално нов тенк, односно концепт кој не е ограничен со вчерашната технологија.
„Oва е првиот главен борбен тенк кој во целост е развиен од Rheinmetall и кој ќе стане главен играч на идните бојни полиња. Со Panther е оживеан концептот на главен борбен тенк кој не е ограничен со карактеристиките на постојните тенкови. Дизајниран е од нула така што лесно може да се надгради и опреми со најнови можности и функции“, соопштија од компанијата.
Тенкот е дизајниран да контролира беспилотни летала како дронови и низа копнени возила без екипаж.